زندگی میں بہت سے گلوبل لیڈرز کو براہ راست بولتے سنا، ٹی وی پر دیکھا، مگر کنگ چارلس کا امریکی کانگریس سے خطاب ایک ماسٹر کلاس تھی۔ اگر دیکھ سکیں تو ضرور دیکھیں، نیکسٹ لیول!
28 اپریل کی شام لندن میں، میں اپنے کمرے میں بیٹھا تھا۔ موسم بدلا ہوا، باہر ہلکی پھوار، چائے کا کپ ٹھنڈا ہو رہا تھا اور ٹیلی ویژن پر سی این این کا براہِ راست نشریہ چل رہا تھا۔ سکرین پر واشنگٹن کا کیپٹل ہل تھا اور کانگریس کے مشترکہ ایوان میں شاہ چارلس سوم اسٹیج پر داخل ہو رہے تھے۔ پیچھے ڈاؤننگ سٹریٹ کا وزیراعظم نہیں، ساتھ کوئی کابینہ کا وفد نہیں، صرف ملکہ کیملا اور بکنگھم پیلس کا روایتی پروٹوکول۔
امریکی نائب صدر اور سپیکر آف دی ہاؤس مائیک جانسن دائیں جانب۔ کانگریس مین، سینیٹرز، فوجی جنرل، سپریم کورٹ کے ججز، سب اُٹھ کر تالیاں بجا رہے تھے۔ امریکی تاریخ میں یہ نواں موقع تھا جب ایک برطانوی بادشاہ نے کانگریس سے براہِ راست خطاب کیا اور پہلا موقع شاہ چارلس کا تھا۔
شاہ نے پوڈیم تک پہنچ کر ایک لمحے کا توقف کیا۔ ہلکا سر ہلایا اور بات شروع ہوگئی۔ مدھم آواز، ٹھہراؤ اور ایک ایسا انگریزی لہجہ جو پانچ صدیوں کی تربیت سے نکلتا ہے، جسے سیکھا نہیں جا سکتا، وراثت میں ملتا ہے۔
تقریر اکتالیس منٹ کی تھی۔ اُس میں چودہ مرتبہ ہال اِجتماعی کھڑے ہو کر تالی بجانے پر مجبور ہوا (اسٹینڈنگ اوویشن)۔ یہ کانگریس کی روایت میں کسی بھی غیر امریکی مقرر کے لیے ایک معیار سے بلند ترین تعداد ہے اور ہر سٹینڈنگ اوویشن، ایک خاص فقرے پر آئی تھی اور ہر فقرہ ایک بادشاہی پیغام تھا، چائے کے بھاپ سے بھرا ہوا تیر۔
پہلا تیر دوسرے ہی منٹ میں چلا۔ شاہ نے کہا، "تین صدیاں پہلے میرے بزرگوں نے، آپ کے بزرگوں سے، ایک ضروری مشورہ کیا تھا۔ وہ مشورہ یہ تھا کہ بادشاہت سے فاصلہ رکھنا چاہیے۔ آج کے دن، میں آپ کو یقین دلاتا ہوں کہ میں اُس مشورے سے پوری طرح متفق ہوں"۔ ہال میں ایک سیکنڈ کا سکوت آیا۔ پھر ہنسی۔ پھر تالیاں۔ پہلی سٹینڈنگ اوویشن۔ یہ برطانوی مزاح کا کلاسیک سیلف ڈی پری کیشن، تھا، یعنی اپنا مذاق خود اڑانا اور پنہاں پیغام؟"ہم نے سیکھ لیا، آپ کو بھی سیکھنا چاہیے"۔
پھر کسی موڑ پر وہ مرکزی جملہ آیا۔ "ایک بندے کی مرضی سے، بلکہ بہت سوں کی مشاورت سے"۔ "نوٹ بائی دی وِل آف ون، بٹ بائی دی ڈی لیبریشن آف مینی"۔ ہال میں دو سیکنڈ کا سکوت۔ پھر تالیاں۔ مگر یہ تالیاں پہلے کی تالیوں جیسی نہیں تھیں۔ یہ تالیاں ایسی تھیں جیسے ہال نے فقرہ پہلے سُنا، پھر سمجھا، پھر یاد آیا کہ یہ فقرہ کس کے بارے میں تھا اور پھر تالی بجائی۔
پانچویں سٹینڈنگ اوویشن پر شاہ نے میگنا کارٹا کا ذکر کیا۔ "1215 میں ایک کمزور بادشاہ کو، ایک طاقتور بیرنوں کے گروہ نے، ایک کاغذ کے ٹکڑے پر دستخط کرنے پر مجبور کیا۔ بادشاہ کا نام جان تھا اور وہ بادشاہ بہت ناراض تھا"۔ یہاں شاہ نے ایک سیکنڈ کا توقف کیا، تھوڑی سی شرارتی مسکراہٹ آنکھوں میں آئی اور بولے، "میں اپنے ایک پرکھ کا دفاع کرنے نہیں آیا۔ مگر اُس کاغذ نے، آپ کا آئین اور آپ کے بانیوں کا سارا فلسفہ، صدیوں بعد ممکن بنایا"۔ ہال قہقہے سے گونج اُٹھا۔ ٹرمپ نے بھی ہنسی، مگر ہنسی اُس وقت تک پہنچ چکی تھی جب اُسے سمجھ آ چکا تھا کہ "ناراض بادشاہ" کا تذکرہ تاریخی نہیں، حالی تھا۔
پھر آٹھویں سٹینڈنگ اوویشن پر بادشاہ نے ایک ایسا برطانوی مذاق کیا جس پر سب ہنسے بغیر نہ رہ سکے۔ "ہم نے 1773 میں آپ کو اپنی بہترین چائے بھیجی تھی"، شاہ نے کہا، "اور آپ نے اُسے بوسٹن کی بندرگاہ میں ڈبو دیا"۔ توقف۔ "اب جب کبھی میں چائے کی پیالی اٹھاتا ہوں، تو سوچتا ہوں، شاید ہم نے آپ کو اپنی بہترین نہیں، بلکہ گھٹیا چائے بھیجی تھی۔ آپ کے ردِعمل سے یہی لگتا ہے"۔ ہال میں قہقہے۔ یہ برطانوی ڈرائی ہیومر، تھا۔ تین سو سال کی ایک شکست کا ذکر، خود کو رعایتی ڈانٹ اور پنہاں طور پر یہ یاد دہانی کہ "آپ بھی تو کبھی ہماری چائے سے ناراض ہو کر باغی ہو گئے تھے، تو آج جب آپ کے اپنے ادارے ناراض ہو رہے ہیں، تو ذرا غور کیجیے"۔
دسویں سٹینڈنگ اوویشن چرچل کے ایک پُرانے فقرے پر آئی، جسے شاہ نے نئے رنگ میں ادا کیا۔ چرچل نے یہ کہا تھا کہ "آپ امریکیوں پر اعتماد کیا جا سکتا ہے، آپ ہمیشہ صحیح کام کرتے ہیں اور باقی سب کچھ آزمانے کے بعد"۔ شاہ نے یہ فقرہ دہرایا اور پھر آخر میں ہلکی سی شرارت کے ساتھ کہا، "میں آپ کو دعا دیتا ہوں کہ آپ باقی سب کچھ، کا تجربہ بہت طویل نہ کریں"۔
تیرہویں سٹینڈنگ اوویشن نسلِ انسانی کی مشترک میراث پر تھی۔ "ہم برطانیہ میں چھ سو سال میں سیکھ پائے کہ بادشاہت ایک علامتی ادارہ بن سکتی ہے اور پارلیمنٹ ہی اصل اقتدار کی جگہ ہے"، شاہ نے کہا۔ "آپ نے دو سو پچاس سال پہلے یہی بات سیکھی تھی اور اپنے بانیوں نے اِسے اپنے آئین میں لکھ دیا تھا۔ ہم تاخیر سے سیکھنے والے رہے، آپ تیز سیکھنے والے۔ مگر سیکھا تو دونوں نے ہے۔ سوال یہ ہے کہ ہم میں سے کوئی، یہ سبق بھول تو نہیں رہا"۔
یہ آخری فقرہ، "ہم میں سے کوئی، یہ سبق بھول تو نہیں رہا"، اِس سارے دورے کا نچوڑ تھا۔ کسی کا نام نہیں، کسی پر تنقید نہیں، صرف ایک سوال، ہوا میں چھوڑ دیا گیا۔ ہر کانگریس مین نے اپنے لیے سُنا۔ ہر سینیٹر نے اپنی پارٹی کے لیے سُنا۔
اب ذرا تین تہوں میں اِس صورتحال کو دیکھتے ہیں۔
پہلی تہہ یہ ہے کہ شاہ چارلس کسی تنہا سفر پر نہیں آئے تھے۔ یہ اپریل دو ہزار چھبیس کا وہ نازک دور ہے جب ٹرمپ کی مایگا بنیاد بکھر رہی ہے۔ ٹکر کارلسن، سٹیو بینن اور رپبلکن پارٹی کے ایک حصے نے علانیہ ٹرمپ پر تنقید شروع کی ہوئی ہے۔ یورپی اتحادی، خاص طور پر اٹلی کی جورجیا میلونی اور ہنگری کے وکٹر اوربان، جو ابھی تک ٹرمپ کے ساتھی تھے، اب فاصلہ رکھ رہے ہیں۔ کانگریس میں ایران جنگ کے خلاف خط بھیجا جا چکا ہے۔ ڈاؤ جونز اڑتالیس گھنٹوں میں دو ہزار پوائنٹس گر چکا ہے۔ ٹرمپ کا کنگ ڈم، زیرِ دباؤ ہے۔
ایسے میں برطانوی شاہ کا واشنگٹن پہنچنا اتفاق نہیں ہے۔ یہ ایک ایسا اشارہ ہے جس کی منصوبہ بندی ڈاؤننگ سٹریٹ نے، فارن آفس نے اور خود بکنگھم پیلس نے، مہینوں پہلے کی تھی۔ پیغام واضح تھا، "ہم آپ کے اتحادی ہیں، مگر ہم آئین کی روایت کے بھی پاسبان ہیں۔ آپ سے دوستی نبھائیں گے، آپ کی اخلاقی پھسلن میں ساتھ نہیں دیں گے"۔
دوسری تہہ زیادہ دلچسپ ہے۔ شاہ چارلس خود کوئی فرشتہ نہیں ہیں۔ شہزادی ڈیانا کا سایہ آج بھی ان کے کندھوں پر بیٹھا ہوا ہے۔ میگن مارکل کے ساتھ خاندان کے رویے پر دنیا بھر میں سوال اٹھے ہیں۔ کیملا کا کوئین کنسارٹ بننا ایک ایسی کہانی ہے جس کے بارے میں برطانوی عوام کا ایک بڑا حصہ آج تک نالاں ہے اور سب سے بڑھ کر، برطانوی نوآبادیات کا تاریخی بوجھ، چاہے وہ بنگال کا قحط ہو، کینیا کا مَؤ مَؤ ہو، یا برصغیر کی تقسیم، شاہی خاندان کی بنیادوں سے کبھی پوری طرح اُترا نہیں۔
یہ سب درست ہے۔ مگر یہاں بھی ایک سبق ہے۔ آدمی اپنی شخصیت کی کمزوریوں کے باوجود، اپنے ادارے کی روایت کا پاسدار بن سکتا ہے۔ شاہ چارلس آئین کی پاسداری کا وہ سبق دے رہے تھے جو شاہی خاندان نے سترہویں صدی سے سیکھا ہے۔ کنگ چارلس اوّل نے بات نہیں سنی، تو اُس کا سر کاٹ دیا گیا۔ بادشاہ سیکھ گئے۔ آج برطانوی بادشاہ علامتی ہے، اصل اقتدار پارلیمنٹ کے پاس ہے اور بادشاہ اِس بات پر ناخوش نہیں، مطمئن ہے۔ ادارے کی موت کا خوف، اقتدار کی کمی کے غم سے بڑا ہوتا ہے۔
ٹرمپ کے امریکا میں اس وقت اُلٹا سفر چل رہا ہے۔ وہاں صدر، کانگریس، عدلیہ، ایجنسی، سب کا تنازع آہستہ آہستہ ایک شخص کی مرضی کی طرف کھِسک رہا ہے۔ ایگزیکٹو آرڈرز کی تعداد ایک سال میں سب سے زیادہ، عدالتی فیصلے غیر مؤثر، کانگریس مفلوج اور صدارتی محل نما رہائش گاہیں نئے سرے سے سجائی جا رہی ہیں۔ ٹرمپ ہاؤس، ٹرمپ ٹاور، ٹرمپ آرگنائزیشن۔ تین سو سال پہلے یورپ کے بادشاہوں کا یہی شغل تھا اور یہی شغل اُن کی تاج پوشیوں اور تاج کشیوں کی وجہ بنا تھا۔
اور یہاں شاہ چارلس کا فقرہ ایک تاریخی آئینہ تھا۔ "نہ ایک کی مرضی سے، بلکہ بہت سوں کی مشاورت سے"۔ یعنی، جناب صدر، آپ کا ملک اِس فقرے پر بنا تھا۔ آپ بادشاہت سے بھاگ کر اِس فقرے پر پہنچے تھے اور آپ آج اُسی بادشاہت کی طرف لوٹ رہے ہیں جس سے آپ کے بزرگ بھاگے تھے۔ ذرا رُک کر سوچیں۔
تیسری تہہ، شاید سب سے دلچسپ، یہ ہے کہ شاہ چارلس نے ٹرمپ پر تنقید نہیں کی۔ تنقید بادشاہی شان نہیں ہے۔ بادشاہی شان آئینہ پکڑنا ہے اور یہ کام انہوں نے نفاست سے کیا۔ بھائی، یہ وہ ہنر ہے جو شاید ہمارے سفارت کار کبھی نہیں سیکھ سکیں گے۔ ہمارے ہاں اگر کوئی پیغام دینا ہو تو ہم تین گھنٹے کی پریس کانفرنس بلاتے ہیں، نام لے کر گالی دیتے ہیں، پھر معافی مانگتے ہیں، پھر معافی واپس لیتے ہیں۔ شاہ نے اکتالیس منٹ میں، چودہ تالیوں کے ساتھ، بغیر کسی نام کے، ایسے فقرے ادا کر دیے جو دنیا بھر کے اخباروں میں اگلے دن کی شہ سرخی بنے۔
اور یہاں برطانوی مزاح کا کمال دیکھیں۔ مزاح بادشاہی ہتھیار ہے اور اِس ہتھیار کی دھار اتنی نفیس ہے کہ کاٹ تو جاتی ہے، خون کا قطرہ نظر نہیں آتا۔ امریکی صدور تنقید کا جواب گالی سے دیتے ہیں۔ روسی صدر زہر سے۔ چینی قیادت خاموشی سے۔ مگر برطانوی شاہ مذاق سے دیتے ہیں۔ "ناراض بادشاہ"، "اوسط چائے"، "باقی سب کچھ کا تجربہ بہت طویل نہ کریں"۔ تینوں فقرے بظاہر ہنسی کے، اندر سے تیر اور ہنسنے والا بھی ہنسے بغیر نہیں رہ سکتا، کیونکہ نہ ہنسے، تو سب کو پتا چل جائے کہ تیر اُسی کی طرف تھا۔
یہی فرق ہے جو ادارے بناتا ہے اور یہی فرق ہے جو ادارے گراتا ہے۔ شاہ چارلس کی کوئی شخصی فضیلت نہیں ہے۔ ان کے ساتھ پانچ صدیوں کی ادا، تربیت، روایت اور اِسٹیج کرافٹ ہے۔ یہ روایت چھ سو برس میں بنی ہے اور چھ سو برس میں ہی اِسے بنایا جا سکتا ہے۔ تیار شدہ نہیں ملتی۔
ٹرمپ کے پاس یہ روایت نہیں ہے اور وہ اِسے دو ہزار چوبیس کی ٹویٹ سے تخلیق کرنا چاہتے ہیں۔ مگر ٹویٹ سے ادارہ نہیں بنتا۔ ادارہ بنانے کے لیے صدیوں کی پابندی، ضابطے کی محبت اور خود سے کم ظاہر کرنے کی استعداد چاہیے۔ ٹرمپ یہ تینوں چیزیں نہیں رکھتے۔ اِسی لیے، شاہ چارلس کے ساتھ کھڑے ہوئے، وہ بڑا کم لگا۔ بھاری وزن کے باوجود، چھوٹا لگا۔ زیادہ تالیوں کے باوجود، تنہا لگا۔
اور یہ منظر امریکا کے کانگریس مین بھی محسوس کر رہے تھے۔ سی این این کے کیمرے نے سینیٹر مٹ رومنی کا چہرہ پکڑا، جو اب ریٹائر ہو چکے ہیں مگر مہمانوں کی گیلری میں موجود تھے۔ رومنی نے ہلکا سا سر ہلایا، جیسے کہہ رہے ہوں، "ہاں، یہ ہم سب کو سُننے کی ضرورت تھی"۔ ڈیموکریٹک سینیٹر چک شومر کی آنکھیں نم تھیں۔ سپیکر مائیک جانسن، جو ٹرمپ کے قریبی اتحادی ہیں، چہرے پر ایک خاص بے چینی لیے تالی بجا رہے تھے۔ ہال نے پیغام سُنا اور ہر ایک نے اپنی اپنی فہم کے مطابق سُنا۔
تقریر کے بعد بکنگھم پیلس کی روایتی عشائیہ تقریب تھی۔ ٹرمپ آئے، تصویریں بنیں، ہنسی مذاق ہوا۔ مگر اخباروں کی شہ سرخی صبح کو ایک ہی تھی۔ دی ٹائمز، دی ٹیلی گراف، دی گارجین اور فنانشل ٹائمز، چاروں نے وہی فقرہ سرخی میں رکھا۔ "نہ ایک کی مرضی سے، بلکہ بہت سوں کی مشاورت سے"۔
نیویارک ٹائمز نے ایک ادارتی مضمون میں لکھا، "ایک بادشاہ نے امریکا کو وہ سبق یاد دلایا جو امریکا اپنے بانیوں سے بھول گیا تھا"۔ واشنگٹن پوسٹ نے لکھا، "اگر یہ کسی برطانوی وزیراعظم نے کہا ہوتا، تو ایک بحران ہوتا۔ بادشاہ نے کہا، تو یہ ایک سفارتی توضیح، تھی"۔
اور بی بی سی کی صحافی لورا کؤنز برگ نے ایک سادہ بات لکھی، "بادشاہت کی واپسی نہیں ہوئی، بادشاہت کی روایت کی واپسی ہوئی"۔ یعنی، ہم چارلس کے کنگ ہونے سے کم دلچسپی رکھتے ہیں اور اُس روایت سے زیادہ جس کے وہ آج کے امین ہیں۔
اب کانگریس کی اُس عمارت میں رات ہو چکی ہے۔ مہمان جا چکے ہیں۔ کیپٹل ہل کے ستون چپ ہیں۔ مگر آئینہ ابھی وہیں رکھا ہوا ہے، جہاں شاہ نے رکھ دیا تھا۔ آنے والے دنوں میں جب کوئی ایگزیکٹو آرڈر دستخط ہوگا، جب کوئی فیصلہ ایک شخص کی مرضی سے کیا جائے گا، تب وہ آئینہ خاموشی سے کہے گا، "ایک شخص کی مرضی سے نہیں، بلکہ بہت سوں کی مشاورت سے"۔
شاید سُنا جائے گا، شاید نہیں۔ مگر آئینہ پکڑنے والے کا کام آئینہ پکڑنا ہے۔ اُس میں چہرہ دکھنا یا نہ دکھنا، یہ سامنے کھڑے شخص کا اپنا مسئلہ ہے۔
