یوٹیوب آٹو میشن بظاہر ایک جدید اور پرکشش اصطلاح ہے لیکن یہ ڈیجیٹل معیشت کا وہ رخ ہے جس نے دنیا بھر میں روایتی میڈیا، ملازمت اور کاروبار کے تصورات بدل دیئے ہیں۔ سادہ الفاظ میں یوٹیوب آٹو میشن سے مراد ایسا یوٹیوب چینل ہے جس میں چینل کا مالک خود ویڈیو میں نظر نہیں آتا، نہ ہی وہ خود اسکرپٹ لکھتا، آواز دیتا یا ویڈیو ایڈیٹنگ کرتا ہے بلکہ یہ تمام مراحل ایک منظم نظام کے تحت ٹیم یا ڈیجیٹل ٹولز کے ذریعے مکمل کیے جاتے ہیں۔
چینل کا مالک بنیادی طور پر منصوبہ بندی، نچ (Niche) کے انتخاب، کوالٹی کنٹرول اور مانیٹائزیشن پر توجہ دیتا ہے۔ یوٹیوب اس وقت دنیا کا دوسرا بڑا سرچ انجن بن چکا ہے۔ گوگل کے بعد سب سے زیادہ سرچ یوٹیوب پر ہوتی ہے۔ عالمی اعداد و شمار کے مطابق یوٹیوب کے ماہانہ ایکٹو صارفین کی تعداد 2.7 ارب سے تجاوز کر چکی ہے جبکہ روزانہ ایک ارب گھنٹے سے زائد ویڈیوز دیکھی جاتی ہیں۔ یہ اعداد و شمار واضح کرتے ہیں کہ ویڈیو کنٹینٹ اب محض تفریح نہیں بلکہ ایک مکمل معاشی نظام بن چکا ہے۔ اسی نظام کے اندر یوٹیوب آٹو میشن ایک باقاعدہ بزنس ماڈل کے طور پر سامنے آیا ہے۔
یوٹیوب آٹو میشن کی بنیادی اہمیت اس بات میں ہے کہ یہ فرد واحد کو ہر کام خود کرنے کی مجبوری سے نجات دیتا ہے۔ روایتی یوٹیوبنگ میں ایک شخص سکرپٹ رائٹر، وائس اوور آرٹسٹ، ویڈیو ایڈیٹر اور مارکیٹر سب کچھ خود ہوتا ہے جس سے نہ صرف وقت زیادہ لگتا ہے بلکہ کام کا معیار بھی متاثر ہوتا ہے۔ آٹو میشن ماڈل میں مختلف مہارتوں کے حامل افراد یا فری لانسرز شامل کیے جاتے ہیں۔ مثال کے طور پر سکرپٹ لکھنے کے لیے الگ شخص، وائس اوور کے لیے الگ اور ویڈیو ایڈیٹنگ کے لیے الگ ماہر رکھا جاتا ہے۔ یوں ایک چینل روزانہ یا ہفتہ وار باقاعدگی سے معیاری مواد فراہم کر سکتا ہے۔ ہم
اسے دور حاضر کا جدید میڈیا کہہ سکتے ہیں۔ اسی طرح اگر اس میں آرٹیفیشل انٹیلیجنس کا استعمال بھی شامل ہو تو پھر یہ کام افراد کی بجائے مصنوعی ذہانت یعنی ایپلیکیشنز کرتی ہیں۔ عالمی سطح پر اگر آمدن کی بات کی جائے تو یوٹیوب آٹو میشن چینلز خاص طور پر انفارمیشن، ڈاکیومنٹری، فنانس، ٹیکنالوجی، ہیلتھ، موٹیویشن اور اینی میٹڈ سٹوریز کے شعبوں میں نمایاں نظر آتے ہیں۔
کئی بین الاقوامی رپورٹس کے مطابق کامیاب آٹو میشن چینل ماہانہ 3 ہزار سے 50 ہزار ڈالر تک کما رہا ہے جبکہ بعض بڑے نیٹ ورکس کی آمدن اس سے بھی کہیں زیادہ ہے۔ یقیناََ ہر چینل اس سطح تک نہیں پہنچتا مگر یہ حقیقت اپنی جگہ موجود ہے کہ یہ ماڈل سکیل ایبل ہے یعنی ایک چینل کے بعد دوسرا اور پھر تیسرا چینل بھی اسی ٹیم اور نظام کے تحت چلایا جا سکتا ہے۔ پاکستان جیسے ترقی پذیر ملک میں یوٹیوب آٹو میشن کی اہمیت دوہری ہو جاتی ہے۔ ایک طرف ملک میں بے روزگاری کی شرح سرکاری اعداد کے مطابق 6 سے 7 فیصد کے درمیان بتائی جاتی ہے جبکہ غیر سرکاری اندازوں کے مطابق نوجوانوں میں یہ شرح کہیں زیادہ ہے۔ دوسری طرف فری لانسرز کی تعداد کے لحاظ سے پاکستان دنیا کے ٹاپ ممالک میں شمار ہوتا ہے۔
یوٹیوب آٹو میشن انہی فری لانسرز کے لیے مسلسل کام کے مواقع پیدا کرتا ہے۔ سکرپٹ رائٹر، وائس اوور آرٹسٹ، گرافک ڈیزائنر اور ویڈیو ایڈیٹر سب اس ایک چینل سے وابستہ ہو کر روزگار حاصل کر سکتے ہیں۔ اسی طرح صحافت میں خاص طور پر چار پانچ لوگ مل کر اپنی مہارتوں کا استعمال کرتے ہوئے ایک چینل چلا سکتے ہیں۔ یوٹیوب آٹو میشن کا ایک اہم پہلو یہ ہے کہ یہ کم سرمائے سے شروع ہو سکتا ہے مگر مستقل مزاجی اور صبر کا تقاضا کرتا ہے۔ عام طور پر ایک چینل کو مانیٹائز ہونے میں تین سے چھ ماہ لگ سکتے ہیں بشرطیکہ مواد معیاری ہو اور یوٹیوب کی پالیسیز کے مطابق ہو۔
یوٹیوب پارٹنر پروگرام کے تحت مانیٹائزیشن کے لیے کم از کم ایک ہزار سبسکرائبرز اور گزشتہ بارہ ماہ میں چار ہزار واچ آورز یا شارٹس کے لیے مخصوص معیار پورا کرنا ضروری ہے۔ یہ اعداد عام فرد کے لیے بظاہر مشکل لگتے ہیں مگر درست حکمت عملی کے ساتھ یہ ہدف حاصل کیا جا سکتا ہے۔ اہم بات یہ ہے کہ یوٹیوب آٹو میشن کو شارٹ کٹ ٹو امیری سمجھنا ایک خطرناک غلط فہمی ہے۔ حقیقت یہ ہے کہ اس میدان میں مقابلہ بھی شدید ہے اور ناکامی کی شرح بھی کم نہیں۔ بہت سے لوگ ابتدائی مہینوں میں نتائج نہ ملنے پر مایوس ہو کر چھوڑ دیتے ہیں۔
ایک پروفیشنل نقطہ نظر یہ ہے کہ یوٹیوب آٹو میشن کو ایک بزنس کی طرح دیکھا جائے جس میں ریسرچ، سرمایہ کاری، رسک اور وقت سب شامل ہیں۔ ڈیٹا کے مطابق یوٹیوب پر 60 فیصد سے زائد چینلز پہلے سال میں غیر فعال ہو جاتے ہیں، جس کی بڑی وجہ غیر حقیقت پسندانہ توقعات اور پالیسیز سے لاعلمی ہے جبکہ باقی یوٹیوب سے پیسے کمانے میں کامیاب ہوتے ہیں۔ قومی سطح کے تناظر میں دیکھا جائے تو یوٹیوب آٹو میشن پاکستان کے ڈیجیٹل بیانیے کو عالمی سطح تک پہنچانے کا ذریعہ بن سکتا ہے۔
انفارمیشن اور ڈاکیومنٹری چینلز کے ذریعے پاکستان کی تاریخ، سیاحت، ثقافت اور سماجی مسائل کو غیر جانبدار اور پیشہ ورانہ انداز میں پیش کیا جا سکتا ہے۔ اس سے نہ صرف سافٹ امیج بہتر ہو سکتا ہے بلکہ زرمبادلہ کمانے کے نئے راستے بھی کھل سکتے ہیں۔ اس وقت پاکستان میں یوٹیوب سے حاصل ہونے والی مجموعی آمدن کا درست ڈیٹا تو دستیاب نہیں مگر ایک اندازے کے مطابق ہزاروں چینلز سالانہ کروڑوں روپے کما رہے ہیں۔
یاد رہے کہ یوٹیوب آٹو میشن کوئی جادوئی فارمولا نہیں بلکہ ایک سنجیدہ ڈیجیٹل بزنس ماڈل ہے۔ اس کی کامیابی کا انحصار علم، منصوبہ بندی، معیار اور صبر پر ہے۔ اگر درست سمت میں رہنمائی، شفاف پالیسی، فہم اور مسلسل محنت کو اپنایا جائے تو یہ ماڈل فرد، معاشرے اور قومی معیشت تینوں کے لیے فائدہ مند ثابت ہو سکتا ہے۔ ڈیجیٹل دور میں اصل کامیابی اسی کی ہے جو وقتی لالچ کے بجائے طویل المدتی وژن کے ساتھ آگے بڑھے۔
